Loading...
Monday

Mikoa inayoongoza kusafirisha watoto watoto kutumikishwa

MIKOA ya Iringa, Kilimanjaro, Kagera na Morogoro ndiyo inayotajwa kuwa na idadi kubwa ya watoto wanaosafirishwa nje ya nchi kwa ajili ya kutumikishwa, utumwa pia dhamana ya deni, anaandika Pendo Omary.

Hata hivyo, juhudi kubwa zinapaswa kuchukuliwa ili kulinda watoto dhidi ya unyanyasaji, ubakaji, ukahaba, kazi za kulazimishwa, utumwa na dhamana ya deni.

Akizungumza na MwanaHALISI Online leo kwa njia ya simu Angel Benedicto, Mwanzilishi na Mkurugenzi Mtendeji wa Shirika la Wote Sawa lenye ofisi zake jijini Mwanza ambalo linatete wafanyakazi wa majumbani amesema “licha ya uwepo wa sheria ya kuzuia usafirishaji haramu wa binadamu ya mwaka 2008, bado tuna kazi kubwa kuzuia usafirishaji wa watoto.”

Amesema, ukubwa wa tatizo hili unatokana na umasikini katika familia nyingi, baadhi ya watendaji wa taasisi za serikali wakiwemo askari wa Jeshi la Polisi, maofisa watendaji na viongozi wa serikali za vijiji na kata kukosa uelewa kuhusu dhana ya usafirishai binadamu wakiwemo watoto.

“Hili ni tatizo kubwa. Pia jamii haina uelewa wa kutosha kuhusu tatizo hili, mwingine anaweza kutenda kosa bila kujua.

“Tunapofungua kesi nyingi zinaishia polisi. Kwa kuwa polisi nao wakati mwingine hawaelewi dhana nzima ya usafirishaji haramu wa binadamu,” amesema Angel.

Amesema, watoto wenye umri wa miaka 14 hadi 16 ndio wanaoongoza kwa kusafirishwa wakifuatiwa na wale wenye umri wa miaka saba hadi 10. Mikoa inayoongoza kwa usafirishaji ni Iringa (asilimia 15), Kilimanjaro (asilimia 9), Kagera (asilimia 9), Morogoro (asilimia 9), Dodoma (asilimia 7), Kigoma (asilimia 7) na Mbeya (asilimia 7).

“Katika kuhakikisha tunaondoa tatizo hili, tayari Wote Sawa tuna mradi wa kutoa elimu kwa mahakimu, wanasheria, wakuu wa wilaya, watendaji wa kata na wenyeviti wa vijiji katika mikoa 10 ya Ruvuma, Tabora, Mtwara, Arusha, Mwanza, Iringa, Mbeya, Dodoma, Dar es salaam na Kigoma,” amesema.

0 comments :

Post a Comment

Note: Only a member of this blog may post a comment.

 
Toggle Footer
TOP