Hongera Prof. Matondo kwa kuonesha mfano

Mara nyingi tumezoea kusikia taarifa za kutisha na kusikitisha kama siyo kuhuzunisha kila linapotajwa suala la afya hasa katika zahanati, vituo vya afya, hosipitali za wiliaya, mkoa, rufaa na hata ile ya Taifa. Leo nimefurahi kuona habari yenye angalizo linalorekebika ila yenye moyo uliyojaa shukrani. Kwa hili, Profesa Matondo nakupongeza.

Prof. Matondo Nzuzulima

Mwaka 1993 nilifanyiwa upasuaji mkubwa wa sikio langu la kulia pale Muhimbili. Nakumbuka ilikuwa ni asubuhi majira ya saa mbili nilipopelekwa katika chumba cha upasuaji. Taa zinazong'ara sana zilikuwa zikiwaka na manesi walikuwa wanamaliziamalizia kuandaa vifaa.

Mara waliingia madaktari wawili wakanisalimia na kuniulizia kama nilikuwa tayari kwa operesheni ile. Niliwajibu kwamba nilikuwa najisikia vizuri sana na sikuwa na woga. Niliwaambia kwamba sikio hilo lilikuwa limenisumbua mno kuanzia utoto na nilikuwa tayari kuhakikisha kwamba tatizo hilo linatatuliwa.
Nilipimwa, joto, shinikizo la damu na vipimo vingine. Daktari anayeshughulika na ganzi pia aliingia. Timu nzima ilikuwa imekamilika. Madaktari wawili bingwa, mmoja wa ganzi na wasaidizi watatu - wote katika mavazi meupe yaliyong'ara na kuwafanya waonekane kama malaika. Muda si mrefu ujao, maisha yangu yangekuwa mikononi mwao.
Wakati nikisubiri operesheni hiyo kuanza waliingia watu wengine kama wanane hivi - wote wakiwa wamevaa majoho yale yale meupe. Mara moja nilitambua kwamba hawa walikuwa ni wanafunzi wa udaktari. Nilikuwa sahihi kwani mara moja darasa lilianza.
Daktari kiongozi alianza kuwaambia tatizo langu lilikuwa ni nini na visababishi vyake. Baada ya hapo aliendelea kuwaelekeza hatua za kufuata katika operesheni ile. Aliwaambia kwamba operesheni inachukua kati ya masaa mawili na nusu hadi matano. Kwamba ilikuwa ni operesheni ya hatari na uwezekano wa mgonjwa kufa, kupofuka au kuwa kiziwi wa kudumu ulikuwa ni mkubwa. Aliendelea kuwaambia kwamba tatizo lilikuwa ni "gland" moja iliyokuwa ndani kabisa karibu na sikio la ndani na kazi yao ilikuwa ni kutafuta mzizi wa gland hiyo na kuung'oa kabisa. Gland hiyo korofi ilikuwa inatoa kemikali ambazo mwili ulikuwa hauzitambui na hivyo kusababisha sikio na kichwa kizima kuvimba kila mwaka. Aliendelea kuwaambia wanafunzi wake kwamba sehemu iliyopo gland hiyo ilikuwa imezungukwa na mifumo tata ya neva mbalimbali (zikiwemo za macho, sikio la ndani na za mfumo wa fahamu) pamoja na mirija mingi sana ya damu. Kwa hali hiyo kosa lolote dogo, lingeweza kuleta matatizo makubwa.
Baada ya darasa lile, yule daktari wa ganzi aliniuliza kwa mara ya mwisho kama nilikuwa tayari. Nilipotikisa kichwa kuashiria ndiyo, basi aliniwekea kifaa cha kupumlia mdomoni na kuniomba nihesabu mpaka 10. Nadhani hata tano sikufikisha. Nilikuja kupata fahamu majira ya saa saba mchana nikiwa kwenye eleveta nikirudishwa wodini. Operesheni ilikuwa imefanikiwa!
Inabidi niseme hapa kwamba maelezo ya darasa lile yalinitisha sana; na kidogo nilijisaili kama ilikuwa sawa kisaikolojia kwa daktari yule kutoa darasa la aina ile mbele ya mgonjwa tena anayekaribia kufanyiwa upasuaji hatari kama ule. Isitoshe, habari karibu zote zilikuwa ngeni kwangu. Nilibaki nikijiuliza, mbona sikuambiwa mambo haya mapema?
Nilipofika hapa Marekani na kuwaambia watu mkasa huu hawakuamini na waliniambia kwamba nilikuwa natania. Eti jambo kama hilo haliwezi kutokea. Niliambiwa kwamba hapa mahospitali hununua maiti kwa masomo yo yote yanayohusu mazoezi ya ana kwa ana.
Baadaye nilikuja kugundua kwamba daktari bingwa profesa aliyenifanyia upasuaji ule na aliyefundisha darasa lile asubuhi ile njema ni mmojawapo wa madaktari bora kabisa kwa matatizo ya masikio na pua nchini Tanzania. Nilipokwenda kufanyiwa uchunguzi baada ya kufika hapa Marekani, madaktari waliniambia kwamba operesheni niliyofanyiwa kule Muhimbili ilikuwa imefanyika vizuri mno na hakukuwa na uwezekano wo wote wa tatizo lililokuwa likinisumbua kujirudia tena.
Japo sikulipenda darasa lake, daima huwa namshukuru na kumwombea daktari profesa bingwa aliyenifanyia upasuaji ule uliofanikiwa. Isitoshe, nikiwa kama mwanafunzi wa chuo kikuu, operesheni ile nilifanyiwa bure. Nimeambiwa kwamba hapa Marekani operesheni kama hiyo inagharimu zaidi ya dola 20,000!
Isitoshe, ni kutokana na operesheni hii hatimaye niliweza kukutana na ubinadamu wa kweli pale Muhimbili, tukio ambalo liliniathiri sana na kubadili mtazamo wangu kuhusu maisha yetu hapa duniani!

Chanzo: matondo.blogspot.com

Comments

Dr.Mallaba link

02/03/2010 2:09am

Kwanza napenda kukupongeza kwa kupata operation most succesful kulingana na sehemu ya eneo husika.
Pili,Kuhusu somo alilolitoa huyo dakitari bingwa kabla ya operation sidhani kama lilikuwa ni tatizo,kwani kama ujuavyo wale wanafunzi au interns wanahitaji elective ili kesho wawe madakitari wazuri pia kwa hiyo ni lazima atoe ujuzi alionao kwa wale wanafunzi,
Tatu,Kuna kitu tuachoita prognosis(the outcome after the treatment or operation)hiki ni kitu cha muhimu sana especially kwa nchi zilizoendelea kwani kabla ya kupata matibabu yeyote baada ya diagnosis daktari ni lazima amweleze wazi kabisa jinsi gani atakavyotibwa na kama kuna possible complication ili mgonjwa atambue na hii pia inapunguza watu kulalamikia malpractice or medical tangle, hali kadhalika baada ya operation lazima umweleze mgonjwa kamaoperation ili kuwa successful or not. na kama nilikuwa succesful huwa kuna percentage kulingana na operation yenyewe let say 5year survial rate is 90%,85% or 40% the lower the percentage the poor the prognosis while the higher the better and ensure less hospitalization with no or minimal complication.
Lastly,Tanzania tunamadakitari wazuri sana ila tatizo ni vitendea kazi,sababu tunaona haohao madaktari wa Kitanzania wanafanya kazi nje ya nchi bila tatizo lolote.

Dr.Mallaba
China.

Vipi kitu

02/03/2010 3:12am

Very wrong,huwezi kumuelezea mgonjwa tatizo lake akiwa kwenye operating table, hii ni tabia mbaya ya kutoheshimu haki na privacy ya mgonjwa ambayo madaktari wengi wa Tz wanayo, hata kama ame conset bado wanafunzi hawatakiwi kujifunzia hapo bali walitakiwa zoezi kama hilo waende Darasani au Mortuary kwenye maiti zisizokuwa na wenyewe, kama ingekuwa ni mimi basi ningeidai Daktari na Muhimbili inilipe kwa kunifanya Guinea pig wao, hii inakuja jamani tubadilike

Bennet link

02/03/2010 3:49am

niliisoma hi habari katika blog ya Prof Matondo, kwa upande wangu sikupendelea kuona wanafunzi wanafunduishwa na kuelezwa madhara yanayoweza kutokea wakati wewe mwenye walikuwa hawajakwambia kabla ya hapo

john mwaipopo link

02/03/2010 8:00am

dk mallaba hebu tuelewane kidogo. shida tunayoipata sie maamuma wa udaktari ni kufundisha wanafunzi mgonjwa akiwa na fahamu zote. ndio maana ukisoma hili chapisho kwa muhusika mwenyewe, utakuta wamarekani walishangaa na kumuona kama mwanasesere.

tunashangaa kwa kuwa tunadhani maelezo hayo kwa hao interns yanaweza kuwa mazuri lakini yakawa mabaya kwa mgonjwa kumpandishia hofu na vitu vingine mnavyovijua. ndio maana nashani mnawapima wagonjwa presha na kuwauliza kama wako tayari.

kwa maelezo ya mhusika, nanukuu "Kwamba ilikuwa ni operesheni ya hatari na uwezekano wa mgonjwa kufa, kupofuka au kuwa kiziwi wa kudumu ulikuwa ni mkubwa." hudhani kuwa hofu inaweza kutamalaki hapo?

yote juu ya yote mgonjwa alipona na upasuaji ulifanikiwa vizuri. lakini inatisha kuongelea vitu kama kufa, kupofuka ama kuwa kiziwi huku mgonjwa anasikia.

Masangu Matondo Nzuzullima link

02/03/2010 1:23pm

Mimi nadhani pengine mtafaruku huu ulitokana na mkanganyiko wa lugha. Kwa vile darasa lilikuwa linafanyika katika Kiingereza (tena kilichochangayika na ile misamiati kamambe ya kitiba), inawezekana Profesa Daktari Bingwa yule alidhani kwamba nilikuwa sifahamu Kiingereza (sawasawa) kama ilivyo kwa Watanzania wengi. Na kama nisingeweza kuielewa mada, basi kusingekuwa na tatizo lolote.

Japo kweli darasa lile lilikuwa na misamiati migumu ya kitiba ambayo sikuielewa, lakini niliweza kuifuatilia mada vizuri sana. Na huo ndio ulikuwa mwanzo wa tatizo. Sidhani kama darasa lile lingeweza kufanyika kama Profesa angejua kwamba nami mgonjwa wake nilikuwa nanyaka kile alichokuwa akikifundisha! Sijui kama hili ni jambo la kawaida katika utamaduni wetu.

Ni lazima nisisitize tena hapa kwamba sina kinyongo na daktari yule na ingawa kwa sasa ameshastaafu pale Muhimbili, popote pale alipo namtakia maisha marefu kwa moyo wake huo wa kusaidia Watanzania wenzake - tena katika mazingira magumu na, kama alivyosema Dr. Mallaba, vitendea kazi duni na malipo kidogo.

Vipi Kitu

03/03/2010 1:12am

Wengi wa madaktari na manesi hufanya makosa haya wakifikiri mgonjwa hajui lolote au kingereza ni cha kwao tu kumbe wanafanya makosa ya kitaaluma ambayo yanaweza kumghalimu hapo baadaye,ngoja nitoe mfano hai mmoja, Siku moja tukiwa ndani ya chumba cha upasuaji KCMC Hospital aliletwa mzee mmoja kufanyiwa upasuaji wa tumbo na hiyo ilikuwa mara ya saba au nane hivi, mee wa watu akiwa kapumzishwa akisubiri zamu yake kupanda kwenye meza ya upasuaji basi binti mmoja kati ya manesi akaanza kimombo chake kilicho changanyika na kikwao, akawa anaelezea wanafunzi kuwa mzee huyu anahisiwa kuwa ni HIV positive kwani ugonjwa wake umekuwa ukirudi kila mara, si munamuona hata alivyokonda, lazima atakuwa candidate etc, kumbe yule mzee alikuwa ni Regional Medical Officer mstaafu kama sikosei Iringa ndiko alikoachia kazi, kwa busara za yule mzee hakujibu kitu palepale lakini siku alipopewa discharge alimtumia salaam yule binti kuwa awe mwangalifu na mdomo wake kwani unaweza msababishia machungu huko mbeleni,hivyo basi utamaduni wa kufikiri tulivyozoea ni sawa si kweli inabidi wataalamu wetu wabadilike

Subi link

03/03/2010 4:23pm

Shukran za dhati zikufikieni Dk. Mallaba, Vipi Kitu, Bennet, John Mwaipopo na Masangu Matondo Nzuzulima kwa maoni endelevu na yanayotekelezeka kabisa kwa mujibu wa sheria, kanuni, taratibu, viapo na miiko ya kazi. Jambo jema katika kusaidiana kutokuyarudia makosa ni katika kukosoa penye kosa na kisha kutoa ushauri, maoni au mapendekezo ya namna ambavyo jambo lapaswa lifanyike.
Siyo jambo la kuzembea tena ati kwa kubaki na dhani kuwa wananchi hawafahamu yanayowahusu.
Asanteni na kama kawaida maoni yenu yanapelekwa jikoni ili mapishi yaboreshwe, si ya bure.

Comments

Leave a Reply

Vitabu vya Watanzania

Yaliyomo/Categories

Hifadhi/Archives