Rafiki yangu kajiunga na mtandao jamii wa Facebook. Ananitumia ujumbe anauliza, "...namna ya kuweka mada mbalimbali ili watu wachangie..." nami namjibu hapa kwa faida ya wengine na urahisi wa kurejea:

1. Nenda kwenye tovuti ya Facebook.com, kisha ingia 'login'
   
2. Katika ukurasa wako mkuu, tizama sehemu ya juu utaona mojawapo ya kifute katika vingi vilivyomo hapo, chenye maandishi yanayosomeka 'Notes', kisha bofya hapo. Ikiwa huoni neno 'Notes' basi huenda limejificha tu, tizama mwisho wa mlolongo wa vifute hivyo na utaona mishale miwili yenye kuelekeza '>>' basi bofya hiyo na utaona vifute vingine ambapo kimojawapo ni cha 'Notes'
3. Utafunguka ukurasa mpya ambapo kulia utaona kifute kinachokuhimiza kuandika mada mpya kinasomeka, 'Write a New Note' basi bofya hapo na utafunguka ukurasa kwa ajili ya kuandikia.
4. Penye neno na sehemu ya 'Title' weka kichwa cha habari/mada/taarifa
5. Kwenye sehemu ya 'Body' itumie kwa kuandika mada/habari/taarifa utakayo
6. Ili kuwaunga watu kwenye habari/mada/taarifa hiyo yaani 'Tag', tizama juu upande wa kulia (katikati ya 'Title' na 'Body') utaona maandishi yanayokuhimiza yasemayo, "Tag people in this note", anza kutaipuu majina ya marafiki zako kwenye Facebook na punde utaiona orodha yao. (kubatilisha uliyemuunganisha, soma maelezo ya Ziada niliyoandika hapo chini mwisho wa maeleozo haya)
   
7. Ikiwa unataka kuambatanisha picha katika ulichoandika, basi shuka chini na utaona maandishi yanayokualika kupakia picha, bofya kifute chenye maneno, 'Browse' kisha chagua picha kutoka kwenye tarakilishi yako.
8. Ikiwa andiko lako imekamilika na li tayari kuchapishwa, basi tizama chini upande wa kushoto kipo kifute kimojawapo kinachosema, 'Publish', bofya hapo na utakuwa umemaliza. Pia vipo vifute vingine vyenye maelezo na waweza kubofya kadiri uchaguzi wako.

Ziada

• Unaweza pia kuandika chochote katika ukurasa wako wa mwanzo katika kisanduku chenye maandishi, 'What's on your mind?' na mtu yeyote atakayesoma 'status update' hiyo akiwa na la kuchangia basi ataliweka hapo kama maoni. Hili ni eneo huru hivyo huwezi kuwaunga watu (tag)  utakavo kupitia 'status update', bali watu wataweza kuchangia kadiri ya ruhusa uliyotoa kupitia 'settings' zako za nani anaruhusiwa kuandika ukutani mwako.
  
• Ikiwa unataka kumtoa mtu, tizama chini ya jina lake ambapo yatakuwepo maandishi yanayosema, 'remove tag' bofya maandishi hayo na tag hiyo itaondoka kwa mtu husika; vile vile mtu huyo bado anao uamuzi wa kujitoa ikiwa hataki kuwemo katika andiko ulilomuunganisha. Kumbuka kuwa kwa kumuunganisha mtu katika andiko au picha hiyo itaonekana pia ukutani mwake. Endapo amewezesha ukurasa wake kusomwa na marafiki au mtu yeyote, basi wengine wataisoma pia. Vile vile mtu yeyote mwingine kwa uamuzi wake anaweza kujiunganisha kwenye andiko (au picha au video) yako nawe utafahamishwa hivyo punde tu mtu huyo atakapojiunga, hata katika hilo, bado unao uwezo wa kumtoa ikiwa hutaki ajiunganishe.
• Kabla ya kuchapisha 'Publish' andiko lako unaweza kulitizama, 'Preview' au kulihifadhi kwa ajili ya kulihariri wakati ujao 'Save Draft' au kulifuta kabisa 'Discard'.
• Tovuti ya Facebook hubadilika mara kwa mara kulingana na inavyoamua menejimenti ya mtandao huo, hivyo maelekezo haya yanaweza kupitwa na wakati au vifute kuhamishwa. Jizoeze kutembelea tovuti hiyo mara kwa mara ili kufahamu mabadiliko yanayotukia na kufuata maelekezo yanayotolewa.