BOFYA HAPA kutengeneza tovuti yako BURE. Create a website for FREE. CLICK HERE! Free hosting and no ads.

 
Kila mmoja wetu atakubali kuwa tukiwa watoto wadogo bado twaenda shuleni, ifikapo saa nne au saa sita kila mmoja alikuwa akijongelea 'deli' la 'Kaka Mkude' ili apate 'barafu' au 'aisikrimu' za aidha ukwaju au ubuyu.
Kwa siye ambao sehemu ya maisha yetu tumekulia mashambani, tulikuwa tukihakisha kuwa popote penye ukwaju panageuka kijia cha msimu, walao hadi msimu wa ukwaju upite, alimradi tudokoe ukwaju.

Tunapokuwa 'wakubwa' hupenda kuona baadhi ya vyakula na matunda kama vile 'ya kitoto' na hivyo kuachana navyo, pasipo kufahamu kuwa tunakosa virutubisho vingi ambavyo ni chanzo kikuu cha afya bora.
Picture
matawi ya mkwaju yakiwa na ukwaju (tamarind - kiingereza)
Zifuatazo basi ni faida za ukwaju ambazo zitakushawishi siku nyingine kuagiza glasi ya juisi ya ukwaju, na kama ni 'waziri wa mambo ya ndani' ya nyumba, au una fahamiana na 'waziri husika' basi agiza aendapo gulioni asiache kuchukua fungu la ukwaju wa kutosha walao wiki kama si mwezi mzima.

Faida 10 za ukwaju:

  1. Chanzo kizuri cha viuasumu mwilini 'antioxidants' ambavyo huzuia Saratani (cancer)
  2. Chanzo cha Vitamini B na C vile vile "carotentes"
  3. Hushusha joto la mwili na kuondosha homa, hasa homa ya malaria na homa ya matumbo
  4. Huulinda mwili dhidi ya mafua na kero za mafua kooni
  5. Husaidia myeyusho na mmengenyo wa chakula na kuondosha kuvimbiwa
  6. Husaidia kutibu matatizo ya nyongo (bile disorders)
  7. Husaidia kurahisisha choo (laxative)
  8. Husaidia kupunguza wingi wa lehemu (cholesterol) na hivyo kuimarisha moyo
  9. Husaidia ngozi kuwa nyororo, vile vile husaidia ngozi inayopona baada ya kuungua au yenye vidonda
  10. Husaidia kuua minyoo tumboni (kwa watoto wadogo)

NB: Ikiwa ukwaju na asali havikudhuru, basi changanya hivyo viwili ili kupata faida maradufu!
 


Comments

ray link
23/07/2010 12:49am

Asalaam aleykum Bi Subira!!

Reply
john mwaipopo link
23/07/2010 1:48am

sasa utajuwaje kuwa ukwaju na asali havikudhuru. si wanasema sumu haijaribiwi kwa kuonjwa?

Reply
Subi link
23/07/2010 2:00am

@Ray, asalaam aleikum!
@John, ikiwa una tatizo na chakula fulani, mara nyingi utafahamu mara baada ya kula kutokana na masumbufu utakayoyapata. Mathalani, mimi sikuwa na tatizo na ulaji mapapai hadi miaka kumi na sita iliyopita baada ya kuwa na maumivu kila nilipokula papai, na nilijaribu hivyo kwa siku na nyakati tofauti hadi nilipoazimu kusalimu amri. Kwa hivyo mtu akiniuliza leo ikiwa nina tatizo na papai, nitasema 'ndiyo' ila kabla ya miaka kumi na sita iliyopita, ningesema, 'hapana'. Nimejua kutokana na uzoefu na si kuambiwa au kwenda kwa daktari au mtaalamu wa lishe.

Hali kadhalika, wanaopata 'allergy' hufahamu hivyo mara baada ya kukumbana na kinachowasababishia 'allergy', la sivyo, hawawezi kujua tu kwa kuambiwa, labda wafike kwa wataalamu wanaopima kuona mwili unaweza kuwa na 'allergy' na vitu gani kwa kufanya 'allergy test' ya vitu kibao. Tafauti na hapo, sisi wengine tunajifahamu kuwa tuna 'allergy' na vumbi baada ya mwili kuanza kuota 'vipele vya kuku' vikifuatiwa na chafya na mafua pale tu unapokumbana na vumbi kali au moshi wa kuchoma matairi ya gari.

Reply
Ommykiss link
23/07/2010 2:18am

Assalaam alaikum,

Ahsante sana da Subi kwa darasa lako hili, kwa mantiki hii basi kule kwetu Zanzibar sisi faida zote 10 tunazipata kwa sbababu ukwaju unatumika sana, maana kama mchuzi ukikosa ukwaju haujapikwa bado.

Reply
boniface msami link
24/07/2010 3:36am

Kwanza naanza kutoa shukurani zangu za zati kwa da, subi, hizi ndizo faida kubwa za lishe, maranyingi tunatakiwa kufahamu kwamba chakula fulani kinatibu nini, au matunda fulani yanatubu nini, au mti fulani unatibu, ni ni tuba nzuri sana, kuliko dawa za hospital ila sisi hatizingatii, ukizingatia zaidi huwezi kuuguaugua huvyo, fuatilia sana vijijini kwetu utakuta baadhi ya watu hospital wanaiangalia kwa nje, jamani tusiishie kusoma tu, gud day

Reply
makiwara
09/08/2010 6:56am

nashukuru kwa somo hilo kwani nimekuwa nikisumbuliwa sana na nyongo. kuna siku nilijaribu kunywa glass ya juis ya ukwaju tumbo liliwaka moto sana sasa sijui ndio uponyaji au ni tatizo linginewe. kama sina asali je sukari inafaa?

Reply



Leave a Reply