Ni faraja sana kuona kitu kama huu ukumbi wa wavuti unawafaidia watu. Hongera kwa kazi kubwa ufanyayo Da Subi. Sisi tunaokufahamu tangu zamani tunaelewa vizuri mchango wako, sio kwa njia ya ukumbi huu tu, bali kwa njia zingine. Mungu azidi kukubariki.

Inatakiwa wengine wafuate nyayo. Jambo moja ni kwamba kama vile wewe unavyojitolea kuendesha ukumbi huu, kutafuta taarifa na kuziweka hapa, wadau nao wawe na moyo wa kuchangia. Kama kuna mijadala, kwa mfano, yeyote mwenye jambo linaloweza kuboresha mjadala achangie.

Lakini, ukipita kwenye hizi blogu zetu, utaona mambo mengi ambayo ni kinyume. Utaona mada imeanzishwa, na halafu wanakuja wadau waitwao "anonymous" wanaandika maneno ya kuchefua na kuchafua hali ya hewa, bila mchango wa maana kwenye mada. Kwa hivi, tunaposifu na kushukuru juhudi ya wavuti, tutambue pia wajibu wetu, kwa kuzingatia mfano wa wavuti.

Napenda kurudi kwenye hoja ya mdau hapa juu, kuhusu watu kujikweza. Ningependekeza tutafakari suala hili kwa kina.

Wa-Tanzania tunaona mtu kujikweza ni jambo lisilofaa. Tunaogopa hata kujitangaza. Lakini je, inakuwaje kwamba kwenye mila za zamani za makabila yetu, kujikweza ilikuwa ni sehemu ya mila? Kwa mfano, katika utamaduni wa wa-Haya, mtu ulitegemewa kufanya mambo ya maana na kisha kujitungia majigambo. Kujigamba na wengine kukusifu katika majigambo ilikuwa ni sehemu ya utamaduni.

Hii jadi ya kufanya mambo bora na kisha kujimwagia sifa au kumwagiwa sifa ilikuwa ni sehemu ya tamaduni nyingi. Mimi ni mtafiti, na ningeweza kutoa mifano kutoka sehemu mbali mbali za Afrika, kama vile Afrika Kusini, Zimbabwe, Rwanda, Nigeria, Mali, Senegal. Kuna machapisho mengi yanayoelezea jadi za huko kote.

Kwa hivi, tutafakari ni wapi na lini sisi wa-Tanzania tuliachana na jadi hii, tukajenga dhana ya kujikweza kama ni kitu kibaya.

Nikiondoka kwenye upeo wa mambo ya mila za zamani, napenda nije kwenye dunia ya utandawazi wa leo. Dunia hii ina ushindani mkubwa sana katika nyanja mbali mbali. Huku Marekani, kwa mfano, ni utamaduni wao kuhimiza kwamba mtu ufanye vizuri katika nyanja zako, halafu unajitangaza. Vijana shuleni wanafundishwa namna ya kuandika wasifu wao. Wasifu huo huitwa "resume." Ukitafakari, utaona kuwa "resume" ni kama majigambo yale ya wahenga wetu, ila katika mazingira ya leo.

Humo hamna cha kujibaraguza. Kama ulifanya kitu cha maana, unakitangaza vilivyo. Ndio wenzetu wanavyowaandaa vijana wao katika ushindani wa utandawazi wa leo.

Nimewaona wa-Kenya huku ughaibuni na jinsi wanavyofanya tofauti na sisi wa-Tanzania. Mkenya anajitangaza, tena kwa kujiamini. Ndio maana hata Tanzania wa-Kenya wanajichukulia ajira, wakati wa-Tanzania wanaogopa kujikweza. Mkenya hajivungi.

Juzi hapo, kwa mfano, niliongea na mama mmoja m-Kenya aishiye hapa Marekani. Ni mwanataaluma, ambaye ana shahada ya udaktari. Alikuwa ananiambia kuwa amefanikiwa kuandika mradi na ambao umemletea hela zitakazomwezesha kufanya mengi nchini Kenya. Jinsi alivyokuwa ananieleza, wa-Tatnzania wangesema anajikweza. Lakini mimi kwa vile naelewa hali halisi ya Marekani, na halafu huyu mtu namfahamu kuwa ni mtaratibu tu, nilicheka kimya kimya, kwa kuwazia wa-Tanzania wangemwonaje.

Naomba nisisitize kuwa ninachosema ni kuwa watu wajibidishe katika nyanja au fani zao ili wapate mafanikio mazuri, na halafu iwe sahihi kutangaza mafanikio hayo, kwani dunia ya leo ndivyo inavyokwenda. Sisemi kuwa mtu ajitangaze mambo ya uongo ambayo hajafanya, yaani mbwembwe zisizo na msingi. Sisemi hivyo.

Kutangaza unachojua au unachoweza ni njia moja ya kuwapa walimwengu fursa ya kukugundua, na hapo wanaweza kukutafuta uwasaidie kwa hili au lile. Tufikirie upande huu pia, na tutaona kuwa hiki kinachoitwa kujikweza, kikieleweka vizuri, kwa misingi hii ninayoelezea, kina manufaa kwa wanadamu.