[audio] Aliyozungumza Lowasa Mei 25, 2015



Mhe. Edward Lowassa amefanya mkutano maalum leo nyumbani kwake mjini Dodoma ambapo ananukuliwa kusema yafuatayo kwa muhtasari:



1. Hahusiki lolote na sakata la Richmond na ndio sababu hata kamati ya Mwakyembe haikuona sababu ya kumhoji. Amesisitiza kuwa cheo cha uwaziri mkuu ndio ilikuwa lengo la kamati ya mwakyembe na spika wa bunge kipindi hicho Samwel Sitta. Amesisitiza hicho sio kikwazo kwake katika kuingia Ikulu kwani sakata la Richmond lilipikwa kumchafua. Amechukua muda mrefu kuzungumzia hili la Richmond na amesema atalisema zaidi Arusha wikendi hii.

2. Anaamini kila mtangaza nia ana makundi ya kumuunga mkono. Yeye katika mkutano huu na wahariri leo ameambatana na Nazir Karamagi, Peter serukamba, Diana chilolo, Hussein Bashe na wengineo huku wengi wakiwa ni waliojeruhiwa katika serikali ya awamu ya nne akiwemo Aliekuwa DC Igunga Elibariki Kingu. Pia aliyekuwa mkurugenzi wa HakiElimu Elizabeti Misoki naye alikuwepo. Amehoji kwani akina Karamagi wana tatizo gani na kwani wao sio binadamu?

3. Lengo kuu atakaloanza nalo ni Elimu na siyo Kilimo Kwanza cha serikali ya Rais Jakaya Kikwete. Amesema serikali ya JK ilikosea kuanza na kilimo na kuweka kando elimu. Ametangaza kuwa sera yake ni Elimu Kwanza.

4. Kuhusu pesa anasema anapata michango ya rafiki zake na ataendelea kupokea michango hii wakati wote wa harakati zake na haina madhara yotote.

5. Anasema hatahama CCM na asiyemtaka yeye CCM ndie aondoke ndani ya chama kwani yeye ana uhakika wa kupata nafasi kuwania Urais.

6. Hatalipa kisasi kwa lolote lililomtokea katika siasa. Amemwachia Mungu kwani yeye ni mcha Mungu.

7. Arusha itawaka moto tarehe 30 mwezi huu na kuwataka watanzania kutega sikio kwani ataanika kila jambo kuhusu mustakabali wa nchi hii na mipango yake ya kuiinua nchi kiuchumi katika miaka kumi ijayo. Lowassa: Nimeingia CCM tangu mwaka 1977. Maisha yangu yapo CCM; Mafanikio ilyopata CCM yasiifanye ikabweteka mwaka 2015; upinzani umeimarika.

8. Toka nimetoka Serikalini; tumekuwa wagumu wa kufanya maamuzi. Kila kitu ni legelege! Waganda, Wakenya na Wanyarwanda wanatupita!

9. Afya ni neema toka kwa Mungu: Nawahakikishia watanzania kuwa “am fit and kicking” nashauri watangaza nia wote tupimwe wote afya

10. Arusha itawaka moto tarehe 30 Mei 2015; Watanzania tegeni sikio kwani nitaanika kila kitu kuhusu mustakabali wa nchi hii!

Wahariri wakuu katika media zote kupitia Jukwaa la Wahariri walikuwepo. Absalom Kibanda (New Habari) na Nevil Meena (Free Media) ndio walikuwa waratibu wakuu wa mkutano huu.

  • Taarifa hii imetumwa na "Mwana Mpotevu" kwenye ukumbi wa majadiliano JamiiForums





HABARI KWA KINA

WAZIRI Mkuu wa zamani, Edward Lowassa amezungumzia kwa mara ya kwanza sakata la Richmond lililosababisha ajiuzulu wadhifa huo, akisema alichukua tahadhari katika suala hilo na kuwa ubishi umeligharimu Taifa kulipa Dola za Marekani bilioni 120.

Mbali na hilo, Lowassa ametaka watu waache kumchonganisha na Rais Jakaya Kikwete, huku akimsifu kwa kutekeleza kwa mafanikio Ilani ya Uchaguzi ya CCM.

Aidha, amesema hana mpango wa kukihama Chama Cha Mapinduzi (CCM), na pia ametoa changamoto kwa wanaCCM wanaotaka kuwania urais wapimwe afya zao.

Lowassa aliyasema hayo jana katika mkutano wake na wahariri wa nyombo mbalimbali vya habari nchini uliofanyika nyumbani kwake Area C mjini hapa.

Lowassa aliyejiuzulu wadhifa wake huo Februari 2008, akihusishwa na sakata la Richmond – kampuni ya kufua umeme iliyoletwa nchini mwaka 2006 baada ya kuwapo kwa matatizo makubwa ya nishati ya umeme, alitoa sababu nne za kukaa kimya tangu wakati huo.

Alizitaja kuwa kwa mwanasiasa kukaa kimya pia ni silaha, hivyo aliamua kukaa kimya; kuogopa upotoshaji wa vyombo vya habari, siasa kuwa za uhasama, kusingiziana na kuogopa kuanzisha malumbano zaidi katika jamii.

Kuhusu Richmond alisema ‘zengwe’ hilo limeeleweka nchini kwani limeandikwa sana na kuzungumzwa sana.
“Lakini tunajifunza nini? Walikuja wakubwa wawili hapa Hillary Clinton na Rais Obama (Barack) wa Marekani…wote hawa walisema kuwa mtambo ule ulikuwa state of the art (wa kisasa sana),”
“Kama alivyoeleza Mheshimiwa Mbowe bungeni hivi karibuni, ubishi ule umegharimu bilioni 120 (Dola za Marekani), tulitaka kuvunja mkataba wa Richmond.
“Nikasema wataalamu wasituingize mkenge, nikamwita Mwanasheria Mkuu wa Serikali nikamwambia kuna story hii, be careful. (Anasema iliandikwa na gazeti la The Guardian).
“Baadaye nikaandika kwa maandishi kwa Mwanasheria Mkuu. Halafu kulikuwa na timu ya makatibu wakuu inaongozwa na Bwana Mgonja (Gray). Lakini ubishi wa kisiasa umetugharimu bilioni 120.”

Alisema pia Waziri wa Fedha wakati huo, Zakia Meghji hakutoa fedha zozote kwa kampuni hiyo na kwamba hata Rais alimwambia aliyekuwa Waziri wa Nishati, Ibrahim Msabaha “kuwa makini, vinginevyo utakwenda kujinyonga kwenu Msoga.”

Lowassa aliongeza kuwa asingependa kulijadili suala hilo zaidi, lakini akatolea mfano alipokuwa Waziri wa Maji na Mifugo, alivyoweza kuvunja mkataba wa City Water.
“Chini ya Rais Mkapa tuliweza kuvunja mkataba ule. Tukafanya vikao saa tisa mchana, tukafanya timing ya benki, kisha ili mzungu yule asipate muda, tukampa warrant, saa tisa akapanda KLM kurudi kwao.
“Tulihofia kuwa kama tusingewahi angekwenda kuweka court injunction (zuio la kimahakama) kwa uzoefu ule wa 1995, tulitaka kuvunja mkataba, lakini nakumbuka rafiki yangu mmoja, Lipumba akasema tutalipa mabilioni, si kweli. Kwa hiyo, wakati ule sikuweza kwa sababu mamlaka hayakuwa kwangu,” 
alifafanua Lowassa.

Alisema imewachukua Hillary Clinton na Rais Obama kuja nchini kueleza kuwa mitambo ile ni ya kisasa, na ndiyo maana alibainisha kuwa alipojiuzulu alisema ajenda ilikuwa ni Uwaziri Mkuu.

Alipoulizwa nani alikuwa anautaka Uwaziri Mkuu, Lowassa ambaye ni Mbunge wa Monduli, alisema hilo anamuachia muuliza swali.

Kuhusu uhusiano wake na Rais Kikwete, Lowassa ambaye alisema Jumamosi atatangaza nia yake ya kuwania urais akiwa Arusha, aliwataka watu waache kumchonganisha na mkuu huyo wa nchi.
“Kwa nini urafiki wetu uwe ajenda? Kwa nini mnapandikiza hilo, yeye ni rafiki yangu, acheni maneno yasiyo na maana,” 
alisema Lowassa na kuongeza kuwa hata kama walichukua fomu pamoja mwaka 1995, lakini miaka mingi imepita na muhimu ni kuangalia kama urafiki wao umeshawishi kitu fulani.

Akizungumzia utajiri wake, mwanasiasa huyo alikiri kumiliki nyumba kadhaa (hakuzitaja idadi) na pia anazo ng’ombe, lakini akaongeza kuwa anauchukia umasikini na anatamani utajiri.
“Hili ni swali zuri sana, lakini mtashangaa majibu yangu. Namiliki nyumba kadhaa na nina ng’ombe kati ya 800 na 1,000. Na kule kwetu ninakotoka, ili uwe kiongozi lazima uwe na mifugo ya kutosha,”
“Lakini kama watu wanataka kufahamu utajiri wangu waende Sekretarieti ya Maadili, unalipa kidogo utasoma kila kitu. Lakini ngoja niseme kidogo, natamani utajiri.
“Tuache kuwabeza matajiri, kuwa na matajiri kama Mzee Mengi, Bakhresa, kina Karamagi, ni jambo zuri sana na hawa ni role model, tungekuwa nao 20,000.
“I hate (nachukia) umasikini. Nataka uongozi ili kuwaondoa Watanzania katika umasikini. Kama mtu amepata utajiri kwa njia za uhalali, amejinyima, ni nzuri sana. Nachukia watu wanaopata fedha na kuishia katika ulevi na wanawake. Kina mama mnisamehe. Sitaki kupata uongozi kwa kudanganya, nachukia umasikini.”

Alipoulizwa kuhusu harambee mbalimbali anazozifanya misikitini, makanisani na kwingineko na kuchangia mamilioni ya fedha, Lowassa alizitetea harambee hizo na kueleza kuwa fedha zinachangwa na marafiki zake.
“Zile sio fedha zangu, kwa mfano kule Arusha juzi, zilichangwa milioni 200, watu wamesema nimechangia shilingi milioni 200, hapana. Mimi na marafiki zangu wa Arusha, Dar na kwingineko tumechanga shilingi milioni 100, Makamu wa Rais amechangia shilingi milioni 10,”
“Kuchangia misikitini, makanisani na katika maendeleo ni jambo zuri, kwa wenzetu wa Kenya harambee ndio kila kitu. Nawashauri viongozi na wabunge kwenda vijijini kusaidia maendeleo kwa njia ya harambee.
“Hili la shule za kata ambalo ni mawazo ya CCM na maelekezo ya Rais, limefanikiwa kwa nguvu za Serikali na wananchi, kwa hiyo harambee zinafaa.”

Kuhusu afya yake, alisema yuko fiti na ni upuuzi kusema kuwa ni mgonjwa, na akatoa changamoto kwa wanaCCM watakaojitokeza kuwania urais, wakapimwe afya zao.
“Nimetembea pale Dar kilometa tano, wakasema siwezi kukimbia hata kilometa 100 na kuwa nimepelekwa Ujerumani kutibiwa. Huu ni upuuzi, ni chuki kutakiana mabaya. Niko fit and kicking. Fit kwa chochote kile.
“Tukapimwe afya zetu kujua nani mgonjwa, tutakutana kwenye uwanja wa mapambano, na I will beat them by far (nitawashinda kwa mbali).”

Alipoulizwa kama asipoteuliwa na CCM kuwania urais, atahama chama hicho, tawala, Lowassa alisema hana mpango B katika hilo, na CCM ni haki yake.
“Sina mpango wa kuhama. Nimeingia CCM mwaka 1977 na sijawahi kutoka katika majukumu yake zaidi ya pale nilipokuwa Mkurugenzi Mtendaji wa AICC.
“My right is CCM (haki yangu ni CCM), sio kwa hao kina kadeti. Huyo ambaye hanitaki CCM ndio ahame. Hakuna mpango B, nina mpango A na naamini utafanya kazi.”

Aidha, akizungumzia kuhusu madai kuwa akiwa Rais atalipiza kisasi, Lowassa alisema yeye ni Mkristo, na imani yake inamtaka kusamehe mara 70, hivyo hatalipa kisasi, moyo wake ni mweupe na yaliyopita yamepita.

Akitoa maoni baada ya kuulizwa kuhusu chama chao CCM, Lowassa alisema hakipaswi kubweteka kwani upinzani umepata nguvu sana mijini na vijijini.
“Tusibweteke wenzetu wamejiandaa, na mkiondolewa hamrudi madarakani, angalia KANU, UNIP na vinginevyo. Lakini faida kubwa ya CCM ni kuwa Rais Kikwete ametekeleza vizuri sana Ilani, hii ndio kete yetu, jamaa mmoja alisema mtaji wetu, lakini isitubweteshe, tutatue matatizo ya wananchi na watu wahimizwe kujiandikisha kwa wingi,” 
alibainisha mwanasiasa huyo.

Lowassa ambaye baadhi ya maswali aliyajibu juu juu au kukataa kuyajibu kwa kuwa alisema yapo katika hotuba yake ya Jumamosi mkoani Arusha, alisisitiza suala la elimu kuwa kipaumbele namba moja na pia tatizo la ajira kama bomu lisiposhughulikiwa ipasavyo.

Kuhusu ajira, alisema chama chochote kinachotaka kushika madaraka, lazima kizungumzie ajira na jinsi litakavyotengeza fursa hizo, akitoa mfano wa uchaguzi wa karibuni wa Uingereza kati ya David Cameroun na Ed Milbrand na pia Obama alipoingia madarakani.

Aliwataka Watanzania walifikirie hilo kwa umakini.

Katika elimu, alisisitiza kuwa kwake kipaumbele cha kwanza, cha pili, cha tatu ni elimu, na kwamba nchi ikiwekeza vizuri kielimu, itasonga mbele kiuchumi.

Alisema elimu nchini imeparaganyika na hakuna budi kusakwa jibu la maarifa kwani imefikia mahali watu wanawachukia Wachina kwa sababu wanakuja na kuajiriwa kama walinzi Kariakoo.

Lowassa alipoulizwa kama angekuwapo serikalini hadi sasa na akaomba kuwania urais, alisema: 
“Naamini kwa kasi ile, ningepunga mkono, na kuzoa kura zote. Lakini nasikitika hatufanyi maamuzi, yawe mabaya au mazuri. Rais amefanya kazi nzuri, lakini hatukupaswa kuachwa nyuma na Waganda, Wanyarwanda.”































GAZETI LA NIPASHE limeandika ifuatavyo...

Waziri Mkuu wa zamani ambaye pia ni Mbunge wa Monduli, Edward Lowassa, amesema kuwa kumekuwa na tabia ya watu kuombeana mabaya na mojawapo ni kuzushiana magonjwa na amependekeza kuwa wakati umefika kwa Chama Cha Mapinuzi (CCM) kupima afya za wagombea wake wa urais ili kujua ukweli nani mgonjwa.

Kadhalika, amesema kuwa yeye ni mzima wa afya na yuko tayari kwa chochote katika mchakato wa mapambano ya kuwaletea wananchi maendeleo.

Lowassa aliyasema hayo jana nyumbani kwake mjini Dodoma alipokuwa anajibu maswali mbalimbali ya wahariri ambayo yalihusu mambo mbalimbali yanayomhusu, lakini siyo masuala ya sera na maono yake kuhusu uongozi wa nchi kwa kuwa hotuba yake anayoitarajia kuitoa Jumamosi ijayo mjini Arusha, ndiyo itaweka wazi maono yake kuhusu uongozi wa nchi.

“Leo hii hata nikikimbia kilomita 100 watasema Lowassa ni mgonjwa. Pale Dar es Salama nilifaya mazoezi na watu wale Albino km tano. Wakasema Lowassa amechoka sana amepata stroke amekimbizwa Ujerumani…. Huu ni uongo mtupu. Naomba tu kusema kuwa afya ni neema kutoka kwa Mungu,” alisisitiza na kuongeza:

“Twendeni tukapime afya zetu nami nitakuwa wa kwanza kupima tujue nani mgonjwa. Mengine nimewa-challenge kwenye speech yangu sitaki kuyasema hapa.”

RICHMOND
Akijibu swali kuhusu kadhia ya mkataba wa Richmond ambao ndio kiini cha kujiuzulu nafasi ya uwaziri mkuu Februari mwaka 2008, Lowassa alisema jambo hilo linajulikana na limekwisha kuandikwa sana.

Hata hivyo, alisema kadhia hiyo ajenda haikuwa mkataba wa Richmond ila uwaziri mkuu.

Lowassa alisema awali alitaka kuvunja mkataba wa Richmond kama ambavyo alifanya kwenye mkataba wa City Water chini ya utawala wa Rais Benjamin Mkapa akiwa waziri wa maji na mifugo, serikali ikashitakiwa, lakini walishinda kesi kwa kuwa walifanya jambo kwa mujibu wa sheria na serikali ililipwa fedha nyingi.

Alisisiziza kuwa nia yake ilikuwa kuuvunja mkataba, serikali ilishirikishwa, lakini mamlaka ya kufikia uamuzi huo hayakuwa yake ingawa kila kitu kilikuwa kinajulikana wazi.

Lowassa alisema hakuna senti moja ya serikali ililipwa Richmond na kutaka aliyekuwa Waziri wa Fedha wakati huo, Zakia Meghji, aulizwe kama kuna senti ya serikali ililipwa Richmond.

Alikumbusha kuwa hata Rais Jakaya Kikwete alimweleza wazi aliyekuwa Waziri wa Nishati na Madini wakati huo, Dk. Ibrahim Msabaha, kutokulipa Richmond fedha za umma kwa kuwa ilikuwa imeonekena kuwa haina uwezo wa kutekeleza mkataba wa kuzalisha umeme hadi kampuni hiyo itakapotekeleza kwa ukamilifu makubaliano yaliyokuwa kwenye mkataba husika.

Lowassa alisema kuwa aliwaita wataalam serikalini akiwamo Mwanasheria Mkuu wa serikali na kuwambia kwamba kuna habari zimeandikwa kwenye gazeti la The Guardian kwamba Richmond hawana uwezo wa fedha kutekeleza mkataba wake.
“Niliwaambia be careful. Nikaweka kwenye maandishi kwa Mwanasheria mkuu. Kwa wale makatibu wakuu kulikuwa na timu ya serikali ya kujadili chini ya Katibu Mkuu wa nafikiri Gray (Mgonja)… maamuzi yalichukuliwa na mnajua yaliyotokea,” alisema.

Aliwataka wananchi kujifunza kutokana na yaliyotokea kwa Richmond kwamba wakubwa wawili, Waziri wa Mambo ya Nje wa Marekani, Hilary Clinton na Rais Barack Obama wa Marekani walifika Tanzania na kuihakikishia serikali kwamba mitambo ya Richmond/Dowans ilikuwa ni mizuri na salama na yenye uwezo wa kuzalisha umeme.

Alikumbusha kuwa kama isingelikuwa ni ubishi wa kisiasa jinsi suala la Richmond lilivyoshughulikiwa, leo Tanzania isingekuwa kwenye wakati mgumu kama ilivyo sasa kwani umeigharimu nchi Sh. bilioni 120 baada ya kushindwa kesi katika mahakama ya usuluhishi wa biashara huko Paris, Ufaransa.

AKUBALIANA NA MBOWE

Alisema suala la serikali kuingia katika madeni hayo pia liliibuliwa bungeni na Kiongozi wa Kambi Rasmi ya Upinzani Bungeni, Freeman Mbowe, kwamba serikali imeshindwa kesi kule Ufaransa ambayo iliamua na majaji Wazungu na sasa itatakiwa kulipa Dowans Sh. bilioni 120 kwa sababu tu ya ubishi wa kisiasa.

Akiwasilisha hotuba ya Kambi ya Upinzani Bungeni Mei 12, mwaka huu aliitaka serikali isimame na isema sasa ni nani walihusika katika kadhia ya Richmond ambayo ni matokeo ya minyukano ya kisiasa ndani ya CCM ambayo sasa yameliingiza taifa katika hasara ya Sh. bilioni 120 baada ya kushindwa kesi huko Ufaransa.

Mbowe alisema katika mlolongo wa kushindwa kusimamia nchi, kuendekeza makundi na vita vya kisiasa ndani ya CCM na serikali yake kwa gharama ya Taifa, sasa linadaiwa Sh. bilioni 120 baada ya kushindwa kwenye kesi ya Dowans/Richmond katika Mahakama ya Kimataifa ya Usuluhishi (ICC) huko Paris.

“Serikali haijataka kuliweka jambo hili wazi na ni dhahiri kuna siri kubwa inayosababisha jambo hili kuwa la usiri mkubwa.

Huko mbele ya safari jambo hili litaligharimu Taifa mabilioni haya ya fedha ambayo yangeweza kuepukika kama ukweli, uwazi na haki vingetawala mchakato mzima wa kashfa ya Richmond. Serikali isimame sasa na ilieleze Taifa ni nani anasema kweli, ni nani alilidanganya Bunge na ni nani analindwa na serikali katika kashfa hii?” alisema Mbowe.

UTAJIRI WAKE

Akizungumzia madai kwamba ana utajiri mkubwa, Lowassa alisema ana ng’ombe kati ya 800 na 1,000 na nyumba chache. Ila kama kuna mwenye kutaka kujua kila anachomiliki taarifa hizo zipo kwenye fomu yake ya kutangaza mali na madeni inayowasilishwa kwa Tume Sekretariati ya Maadili ya Viongozi wa Umma.

Hata hivyo, alisema: “Ninauchukia sana umasikini, ninapenda utajiri. Napenda Watanzania wachukie umasikini. Ninautafuta uongozi wa nchi hii ili kuwasaidia wananchi kuachana na umasikini siyo kuukumbatia,” alisema.

Alitoa angalizo kuwa anatamani nchi hii iwe na watu wenye uwezo wengi kama Reginald Mengi (Mwenyekiti Mtendaji wa IPP), Said Bakhressa (Mmiliki wa AZAM), Nazir Karamagi, ili kusaidia kuondoa umasikini nchini.

Alisisitiza kuwa hana tatizo lolote na utajiri ambao umepatikana kwa njia halali, ingawa kuna watu wanawaonea wenzao wivu kwamba wamefanikiwa wakati wao walipata fursa, lakini kazi yao ni kuendekeza ulevi na wanawake.

Alitaka wanasiasa waache kuwadanganya watu kwamba umasikini ni kitu kizuri.

Akizungumzia madai kwamba amekuwa anatoa fedha nyingi katika harambee mbalimbali anazoendesha nchini, Lowassa alisema kwamba hana fedha ila ana marafiki.

Alisisitiza fedha zinazopatikana katika harambee zinachangwa na marafiki wake mbalimbali na yeye kazi yake ni kuongoza harambee hizo ambazo kwa maoni yake zimesaidia sana maendeleo katika jamii. Aliwashauri wabunge wainge mfao huo kwa kufanya harambee mbalimbali vijijini ili kusiadia kuchangia maendeleo ya jamii. Alikumbusha kuwa shule za kata zilijengwa kwa harambee.

ELIMU 

Lowassa alisema elimu ya Tanzania imevurugwa sana na juhudi kubwa ni lazima zichukuliwe kurekebisha hali hiyo. Aliitaja elimu kuwa ndiyo mkombozi wa matatizo mengine makubwa ya taifa kama ukosefu wa ajira kwa vijana.

Alisisitiza msimamo wake kuwa sera inapashwa kuwa elimu kwanza na siyo kilimo kwanza, kwa kuwa ni kupitia elimu kilimo kinaweza kuboreshwa na kuleta tija.